માર્ક કાર્ની બન્યાં કેનેડાના નવા વડાપ્રધાન, વિધિવત લીધા શપથ - MARK CARNEY

Mark Carney Become Canada's New Prime Minister : ભૂતપૂર્વ કેન્દ્રીય બેંકર માર્ક કાર્નીએ શુક્રવારે કેનેડાના નવા વડા પ્રધાન તરીકે શપથ ગ્રહણ કર્યા છે, હવે તેઓ યુએસ પ્રમુખ ડોનાલ્ડ ટ્રમ્પ દ્વારા શરૂ કરાયેલા વેપાર યુદ્ધ, વિલીનીકરણની ધમકીઓ અને સંભવિત સામાન્ય ચૂંટણીઓ વચ્ચે પોતાના દેશને આગળ વધારવાનો પ્રયાસ કરશે, મહત્વપૂર્ણ છે કે, કાર્ની કેનેડાના 24મા વડાપ્રધાન છે.

કાર્ની (59) એ વડા પ્રધાન જસ્ટિન ટ્રુડોનું સ્થાન લીધું હતું, જેમણે જાન્યુઆરીમાં તેમના રાજીનામાની જાહેરાત કરી હતી. લિબરલ પાર્ટીએ નવા નેતાની પસંદગી કરી ત્યાં સુધી ટ્રુડો સત્તા પર રહ્યા. એવી અપેક્ષા રાખવામાં આવે છે કે કાર્ની આગામી દિવસોમાં અથવા અઠવાડિયામાં સામાન્ય ચૂંટણીની જાહેરાત કરી શકે છે.

ટ્રમ્પે કેનેડિયન સ્ટીલ અને એલ્યુમિનિયમ પર 25 ટકા ડ્યૂટી લગાવી છે અને 2 એપ્રિલથી તમામ કેનેડિયન પ્રોડક્ટ્સ પર ભારે ડ્યૂટી લાદવાની જાહેરાત કરી છે. બ્લૂમબર્ગના અહેવાલ મુજબ, માર્ક કાર્નીની નવી કેબિનેટ ટ્રુડોની કેબિનેટની લગભગ અડધી કદની હોઈ શકે છે. એવું કહેવામાં આવ્યું હતું કે તેમની કેબિનેટમાં 15 થી 20 મંત્રીઓની સંભાવના છે, જ્યારે હાલમાં વડાપ્રધાન સહિત 37 મંત્રીઓ છે.

► માર્ક કાર્ની એક બેંકર અને અર્થશાસ્ત્રી 

માર્ક કાર્ની એક અર્થશાસ્ત્રી અને પૂર્વ સેન્ટ્રલ બેંકર છે. કાર્ની 2008માં બેંક ઓફ કેનેડાના ગવર્નર તરીકે ચૂંટાયા હતા. કેનેડાને મંદીમાંથી બહાર કાઢવા માટે તેમણે લીધેલા પગલાંને કારણે, બેંક ઓફ ઈંગ્લેન્ડે તેમને 2013માં ગવર્નર પદની ઓફર કરી. બેંક ઓફ ઈંગ્લેન્ડના ૩300 વર્ષના ઇતિહાસમાં આ જવાબદારી સોંપવામાં આવનાર તેઓ પ્રથમ બિન-બ્રિટિશ નાગરિક હતા. તેઓ 2020 સુધી તેની સાથે જોડાયેલા રહ્યા. બ્રેક્ઝિટ દરમિયાન લેવામાં આવેલા નિર્ણયોએ તેમને બ્રિટનમાં પ્રખ્યાત બનાવ્યા.